ReadyPlanet.com


บุญบั้งไฟ



“บุญบั้งไฟ”

……………

โอเฮาโอ่เฮาโอเฮาโอ                        เสียงคนโห่เอาบุญบั้งไฟ

ฟ้อนรำเต้นเห็นมาแต่ไกล                   ฮ้องฮำไปว่าเฮาโอเฮาโอ่

สาวบ้านใด๋ผู้งามแท้หล่า                    แต่งเสื้อผ้างามตาท่าโก้

ขี่รถ(เกวียน)มาอวดองค์ทรงโชว์          อ้ายเบิ่งโต๋บ่สมเจ้านั่น

ฮอดเวลายามลมฝนฟ้า                     แห่บั้งไฟกล้าท้ามาแข่งขัน

รินเหล้าจอกออกมาประชัน                ม่วนนำกันเด้อพี่น้องบ้านเฮา

บุญเดือนหกของคนอีสาน                  สุขสำราญเบิกบานข่อยเจ้า

ฮอดเวลาจูดบั้งไฟเฝ้า                      เอาเฮาเอาขึ้นสู่แดนเมืองแมน

จรวดอีสานทะยานขึ้นฟ้า                   นำความข้าหาพระยาแถน

ขอฝนฟ้าตกมาทั่วแดน                     เหล้าสักแบนซิแขวนนำให้ดอก

โอเฮาโอ่เฮาโอเฮาโอ                       ขอเหล้าโทกินนำเจ้าจักจอก

เหล้าต้มเมาของเฮาบ้านนอก              บั้งไฟหลอกซิถึกจับนอนตม

มาเด้อมาเอาบุญบ้านเฮา                   ซุมหมู่เจ้าอย่าเศร้าขื่นขม

ฮีตอีสานมีมานานนม                        ม่วนรื่นรมย์เอาบุญบั้งไฟ

โอเฮาโอ่เฮาโอเฮาโอ                        สาวคนโก้โต๋อยู่บ้านใด๋

ฝากเอิ้นถามยามเจ้าจากไป                ขอหัวใจน้องนางได้บ่

อ้ายคนโซผู้ฮ้ายหมายตา                   น้องนางฟ้าผู้งามลออ

พระยาแถนลูกอ้อนวอนขอ                 นี่ล่ะหนอให้เป็นเมียผู้ข้า

โอเฮาโอบั้งไฟขอฝน                        ให้ผู้คนฮับฝนทั่วฟ้า

อีสานเฮาสุขกันถ้วนหน้า                   ข้าวน้ำปลาอุดมสมบูรณ์ฯ                  

บ้านเฮือนเฮาพี่น้องอบอุ่น                  คลองน้ำขุ่นบุญค้ำรวมศูนย์

โฮมน้ำใจตุ้มมาพอกพูน                     ฮีตค้ำคูนอีสานบ้านเฮาฯ

ขอน้อมคารวะจากใจ

"ทรชนบ้านนอก"




ผู้ตั้งกระทู้ ทรชนบ้านนอก :: วันที่ลงประกาศ 2012-05-21 16:06:08


แสดงความคิดเห็น
ความคิดเห็น *
ผู้แสดงความคิดเห็น  *
อีเมล 
ไม่ต้องการให้แสดงอีเมล


Copyright © 2010 All Rights Reserved.